Nach Noosa ischs denn wieter gange nach Rainbow Beach, vo wo ich e Tour nach Fraser Island gmacht han... Fraser Island bestaht us 97% us Sand, de Rest us Felse...

 Obe drah, gseht mer de Rainbow Beach, und unnedrah gseht mer scho d Ferry zum nach Fraser Island uebere zcho...

D Jeeps sind ready 

 Mir sind denn mit eusen riesige Jeap am Strand entlang gfahre, und ja es gseht echt so us wie das Foti es eim brichtet... De Innland Track isch gschlosse gsi, und so hemmer am Strand entlang muesse fahre, obwohl d Tide scho inne cho isch... Es het eifach gheisse nie stah bliebe... S wasser isch sicher ueber 1 Meter hoech gsi... Euse Driver het am Schluss gmeint, das segi echt scary gsi, und er bruechi jetzt en Drink...

 Obe dra de McKenzi en Suesswassersee, wo mer drin chan go bade... Uf Fraser Island gits ueber Hundert Suesswassersehe..

Ja und wildi Dingos hemmer au gseh! Wemmer noed wuessti das das en wilde Hund isch, denn wuer mer de am liebste knuddle!!!

 Am naechste Morge het die Schlage obe drah, es Sunnebad vo eusere Tuere gna... Ich han na denkt, he was let denn da fuer en komische Schnuersenkel?! D Alex, e Kanaderin isch aber im Stechschritt use und  chum ueber de Schlage, kreischi voll druf los, dass sie fascht uf e Schlange gstande segi!!! Zum Glueck het de Raum en Hinderusgang gha, wo ich mich denn de vo gstolle han, da mer i dem Land ja nie weiss was giftig isch, und was noed... Euse Tourguide het aber gmeint, dass das e Phyton gsi segi, also nuet wuerkli giftigs...

 Mir hend denn na en chlini Wanderig dur de Regewald gmacht, und nur en Meter nebet em Fuessweg isch die Schlange glaege...

 Da bimne andere Suesswassersee.. Das het mich grad chli a di hei erinneret, da mer mal noed im Salzwasser schwuemmt...

Und das wers au scho wieder gsi vo Fraser Island